Sinom
NGUNGAK –UNGAK JANGKA JAWA
Ngungak - ungak Jangka Jawa
Yen lumebu madya akhir
Ana Dewa ngeja wantah
Ajejuluk Ratu Adil
Ratu kang Amisani
Putra Dewa kang Pembayun
Jumenenge datanpa
Srana lan syarat sadawir
Golekana kaki ajo nganti sasar
Ratu Adil dudu mnungsa
Rasa Tumata sayekti
Adil nyumrambahi badan
Tua anom gede cilik
Wong mlarat lan wong sugih
Edan waras budek bisu
Kafir lan wong iman
Rasa tan mbedakne kaki
Skabehe kesrambahan gelar gumelar
Kratone Alas Ketangga
Mula rasa iku kaki
Kang saka keteging angga
Ratu Amisan dwe werdi
Urip kang ana dingin
Tan ana nglangkungi sepuh
Kang disik lan wekasan
ngadeg tanpa syarat sdawir
Pancen urip datan butuh neka – neka
Kang Pembayun aran Putra
Putra iku Urip cilik
Urip Gede iku Rama
Sadurunge jagat lair
Putra sinabda dadi
Cinitra saking wahayu
Mula sinebut anak
Tembung putra mengku werdi
Palungguhan Urip kang Tmata ing Rasa
Ingkang diwastani anak
Iku sabda kun ska Gusti
’’Anane klawan piyambak’’
Jalmi amung disilihi
Digawe angarani
Nyebut bapak anak ibu
Sjatine kabeh asma
Sipat jalma digaduhi
Mula kabeh jeneng kagungane “Gesang”
Jarwane Pembayun ika
Kang dinuta amisani
Ing alkitab wis diserat
Yen Yesus menika luwih
Sepuh timbang Ibrahim
Yesus anak ingkang Sulung
Ing Islam uga ana
Nalika Adam dumadi
Muhammad Rasullulah lwih disik ana
Ana maneh kang jinangka
Sang Ratu kagunggan karsi
Akarya ‚‘Sungsang Buwana
Balik‘‘ ingkang mengku werdi
Kang asung gesang karsi
Hambalikake kang kalbu
Pinda ngumbah kukusan
Ingkang njero dadi njawi
Kang asor mnyang luhur kang nduwur mnyang ngandap
Samengko jangka cinandra
Candra candrane negari
Kidung Sunan Kalijaga
Semut ireng anak sapi
Smut reng iku wong cilik
Nganak ke pejabat agung
Keong yo wong kang lemah
Kondang wani demontrasi
Wong bodho ra wedi nyabrang kali bngawan
Arus banter kang winastan
Aturan hukum tan wedi
Timun woku godong wolu
Wong Minoritas wis akih
‘’Wolu penjuru angin
Dwe sedulur’’ simbulipun
Yen Wong Jawa mung skawan
Sdulur kiblat papat kaki
Surobaya geger kepati wis nyata
Gegere wong ngoyak macan
Pjabat diwadai bui
Lun alun iku negara
Kerta kalla sura wani
Gajah ngamuk tinali
Remeh asma akhiripun
Sasat cineker ayam
Srobaya – Jkarta simbolis
Ing jamane ala becik da aYuda
Nanging ja kaliru tampa
Iku kahanane negri
Asmane kalebu jangka
Yen pyayine mbeg utami
Jo lapurke pulisi
Mundak aku kena bendu
gitu saja kok marah
Jawabe, ya iyalah dik
Masak ya iya donk,Gusti nywun ngapura
Mangkono iku tinimbang
Kongkow sing ra maedahi
Crita - crita ngambra ambra
Madat, minum,lan ngrasani
Aluwung ngripteng kawi
Mbok menawa isinipun
kang becik sa tinulad
Ingkang ala den singkiri
Kena kinarya palupi semah yoga
Yoh padune dadi jeksa
Jek rekasa sawetawis
Wus sewindu angreranta
‘doh sanak kadang pamili
Duh gusti ingkang asih
Pinaringana pitulung
Nadyan kula rekaos
Saturun manggiha mukti
Mulyane nyoto latri hawan wibawa
Tidak ada komentar:
Posting Komentar